شکورجان ظهوراف، رئیس  پارلمان تاجیکستان با صلاح الدین ربانی، وزیر امور خارجه افغانستان دیدار و گفت‌وگو کرد.

ظهوراف در این دیدار با تاکید به اینکه دوشنبه همواره خواستار تامین ثبات و امنیت در افغانستان بوده، افزود: صلح و آرامش در افغانستان کلید اصلی برقراری ثبات در سرتاسر منطقه است.

وی در ادامه با یادآوری از نقش کلیدی برهان الدین ربانی و احمدشاه مسعود، 2 شخصیت تاریخی افغانستان در برقراری صلح بین تاجیک‌ها، افزود: این 2 شخصیت بزرگ در سال‌هایی که تاجیکستان با مشکلات جدی روبرو بود، کمک زیادی به این کشور در زمینه برقراری صلح کردند، آنان پیام آوران صلح بودند.

رئیس پارلمان تاجیکستان اظهار داشت: درحال حاضر 6 پل بزرگ بین تاجیکستان و افغانستان ساخته شده تا حمل و نقل کالا و تردد شهروندان 2 کشور را تسهیل کند.

طرفین در این دیدار به توسعه همکاری تاجیکستان و افغانستان در زمینه‌های سیاسی، امنیتی، اقتصادی، و حمل و نقلی بین دو کشور، از جمله اجرای هرچه سریع‌تر ساخت راه آهن تاجیکستان- افغانستان- ترکمنستان، چین- قرقیزستان- تاجیکستان- افغانستان- ایران، پروژه کاسا- 1000 و خط لوله گاز افغانستان- تاجیکستان تاکید کردند.

ظهوراف و ربانی تاکید کردند: تاجیکستان و افغانستان همکاری‌ دو جانبه در پرونده حفظ ثبات و امنیت در مناطق مرزی مشترک، مبارزه با قاچاق مواد مخدر و جلوگیری از تروریسم و افراط گرایی را ادامه خواهند داد.

در پایان این دیدار، وزیر امور خارجه افغانستان از حمایت و پشتیبانی مداوم تاجیکستان از موقعیت کابل در سازمان‌های بین المللی و منطقه‌ای اظهار رضایت کرد.